Kryetari i Bashkimit Demokratik për Integrim, Ali Ahmeti, ka thënë se koalicioni VLEN, i mbështetur nga kryeministri i Kosovës Albin Kurti, dhe që në listë ka anëtarë të Vetëvendosjes, “në mbrëmje do të dorëzojë peshqirin në ring nga goditjet e forta”.
Pas votimit në zgjedhjet parlamentare dhe presidenciale në Maqedoni të Veriut, Ahmeti ka thënë se pret që rezultatet të pranohen nga të gjithë e që në fund të triumfojë filozofia për t’i çuar proceset përpara e të mos ketë devijim nga kursi euroatlantik i vendit.
“Të gjitha palët duhet të mendojnë se me 9 maj, nesër, duhet të punohet për shtetin, për paqen, për ardhmërinë, ekonominë, standardin jetësor dhe jo me fraza patriotike folkloriste dhe vullneti i shqiptarëve është i pakapërcyeshëm. Ai që do paqen dhe stabilitetin respekton edhe vullnetin. S’kam çka shtoj më shumë”, ka thënë ai për gazetarët.
I pyetur për mbështetjen që Kurti dhe Vetëvendosje ia kanë dhënë koalicionit shqiptar VLEN, Ahmeti ka thënë se “mirë që e bëjnë dhe ju ndihmon, por peshqirin do ta dorëzojnë në ring sepse goditjet do të jenë shumë të forta”. Ai ka thënë po ashtu se çështja e hetimit të luftës nuk mund të rikthehet “pasi është mbyllur tash e 23 vjet më parë”.
“Amnistia për palët ndërluftuese është nënshkruar nga presidenti i shtetit të atëhershëm dhe unë si komandant i përgjithshëm i Ushtrisë Çlirimtare Kombëtare, amnisti që është pranuar dhe garantuar nga NATO-ja, SHBA-ja dhe Bashkimi Evropian”, ka thënë ai.
Në Maqedoninë e Veriut po mbahen zgjedhje të dyfishta – presidenciale dhe parlamentare.
Në raundin e dytë të zgjedhjeve presidenciale do të votohet për dy kandidatë, ndërsa në zgjedhjet parlamentare për 17 lista të deputetëve.