KORÇË- Gjykata e Korçës ka lënë në fuqi masën e sigurisë arrest me burg për ish-shefin e policisë Stiljan Pasho, i arrestuar tre ditë më parë nën akuzën se lejoi kalimin pa kontroll të një makine me drogë.
Pasho u vu në pranga në datën 30 Nëntor, me urdhër të Prokurorisë së Korçës, në bashkëpunim me Agjensinë e Mbikqyrjes policore. Pasho iu ka kërkuar vartësve të tij, që të mos kontrollinin një makinë, në të cilën gjendej një sasi prej 26 kilogramësh kanabis, që kishte si destinacion Greqinë.
Dyshohet se droga ishte futur në një bombol gazi dhe ndodhej në garazhin e makinës. Kryekomisari ka kaluar kufirin bashkë me të për t’u siguruar që makina të mos kontrollohej. Sapo është siguruar për kalimin e drogës është kthyer sërish mbrapsht në kufirin shqiptar.