Ministri i Punëve të Brendshme, Oliver Spasovski njoftoi që prej sot do të nisë me punë pika për nxjerrjen e dokumenteve personale pa termin, shkruan TV21. Pika e Ministrisë së Punëve të Brendshme është e lokalizuar në sallën e policisë së trafikut në kuadër të Stacionit Policor “Prolet” në Komunën e Kisella Vodës.
“Sistemi është testuar dhe mundëson që mbi 1000 persona për periudhën e një dite të punës ta kalojnë gjithë procedurën. Dua të theksoj se orari i punës së pikës është nga ora 8, deri në orën 18:00, me mundësi që të vazhdohet deri në orën 20:00”, theksoi Spasovski.
Spasovski njoftoi se me emrin e ri të shtetit, gjegjësisht, Republika e Maqedonisë së Veriut janë lëshuar një milion e 50 pasaporta, rreth 900 mijë letërnjoftime dhe 480 mijë patenta të shoferit. Ministri u ankua se shumë qytetarë nuk janë paraqitur në terminet e caktuara paraprakisht.
“Arsyeja për hapjen e kësaj pike të re ka qenë numri i banorëve në Shkup si dhe fakti që rreth 70 për qind e termineve të caktuara që i kanë rezervuar qytetarët përmes numrit të telefonit, apo përmes rrugës elektronike, i anulojnë, respektivisht nuk paraqiten në ato termine”, theksoi Spasovski.
Kjo pikë pritet të lehtësojë detyrimin për ndërrimin e dokumenteve personale për të gjithë shtetasit, sipas emrit të ri të shtetit, Republika e Maqedonisë së Veriut deri më 12 shkurt 2024./tv21.tv