E ardhmja e supermodeleve të BMW-së, M3 dhe M4 duket se do të jetë elektrike. Më 2022, shefi i departamentit të zhvillimit në BMW, Frank Weber, ka paralajmëruar se modeli i ardhshëm M3 mund të kalojë në fuqi elektrike. Tash detaje specifike ka dhenë shefi i divizionit “BMW M”, Frank van Meel. Në një intervistë për “Drive”, Van Meel ka thënë se M3 dhe M4 mund të kenë vetëm versione elektrike, por vetëm nëse janë “më të mirë se gjenerata paraprake”.
Sipas tij, çdo gjeneratë e re e modeleve “M” duhet të jetë më e fuqishme në performancë se pararendësja. Nëse BMW mund t’i arrijë këto caqe për veturën “M” me versione elektrike, ai ka thënë se edhe modelet M3 dhe M4 do të jenë tërësisht elektrike. Nëse jo, veturat do të mbesin me motorë me djegie të brendshme.
“Logjika është shumë e thjeshtë”, ka thënë ai. “Por sigurisht, po përpiqemi që ta bëjmë vetëm elektrike”. I pyetur për mundësinë e disa opsioneve të motorëve, ai ka refuzuar të pranojë se BMW do të ofrojë edhe motorë me djegie edhe elektrike e hibride. Sipas tij, nuk është reale që të prodhohen tri versione. Aktualisht modelet M3 dhe M4 kanë motor 3.0-litërsh me 503 kuajfuqi./koha