Nga gazetarja Liridona Vejseli, PaCensurë
Në Ndërmarrjen Publike Komunale në Saraj, situata ka dalë jashtë kontrollit. Punëtorët kanë katër muaj që nuk marrin paga, ndërsa çdo ditë përballen me borxhe, kredi dhe nevoja bazike që nuk presin.
Burime të kontaktuara nga PaCensurë bëjnë të ditur se gjendja është alarmante. “Nuk kemi me çfarë të mbajmë familjet. Kreditë nuk ndalen, faturat nuk falen. Katër muaj pa të ardhura është e papërballueshme”, shprehen punëtorët, të lodhur dhe të zhgënjyer nga heshtja institucionale.
Në anën tjetër, drejtori i ndërmarrjes, Idriz Hoxha nga koalicioni VLEN, e arsyeton situatën me borxhet e trashëguara dhe pamundësinë për të siguruar mjete financiare. Sipas tij, kërkesa për limit nuk është miratuar nga NLB Banka, duke e lënë ndërmarrjen pa hapësirë për të paguar rrogat.
Por për punëtorët, këto arsyetime nuk vlejnë. Ata kërkojnë vetëm atë që u takon: pagën për punën e bërë. Në një kohë kur jetesa po bëhet gjithnjë e më e vështirë, katër muaj pa rroga nuk është vetëm problem financiar, por goditje direkte ndaj dinjitetit të tyre.
Ndërkohë, drejtori premton se “do të gjendet zgjidhje”, por pa dhënë afate konkrete. Kjo vetëm sa rrit pasigurinë dhe revoltën tek punëtorët, të cilët ndihen të lënë pas dore nga menaxhmenti dhe nga ata që i kanë vendosur në këto pozita.
Rasti i NPK-Saraj hap pyetje serioze për përgjegjësinë e drejtuesve dhe për rolin e koalicionit VLEN në menaxhimin e ndërmarrjeve publike. Kur punëtorët mbeten pa bukën e gojës për muaj të tërë, çdo arsyetim tingëllon si shmangie nga përgjegjësia.