Vladimir Putin e ka shkarkuar nga pozita ministrin e tij të Mbrojtjes, Sergey Shoigu.
Në një ndryshim rrënjësor që i ka bërë kabinetit në mes të Luftës në Ukrainë, Putin ka caktuar si ministër të ri Andrey Belousov, një këshilltar të tijin afatgjatë rreth çështjeve ekonomike.
Belousov ishte ministër i ekonomisë i Rusisë në 2012-2013, ndihmës i Putinit në 2013-2020 dhe zëvendëskryeministër i parë në 2020-2024.
Lajmin e ka raportuar edhe agjencia ruse e lajmeve TASS, teksa mendohet se posti i ri për Shoigun do të jetë ai i sekretarit në Këshillin rus të Sigurisë Kombëtare.
Në këto kushte, Nikolai Patrushev duhet ta lërë këtë pozitë, të cilën e mbante prej një kohe të gjatë.
Shoigu është përballur me kritika nga “skifterët” pro-luftës ruse për keqpërdorimin e fondeve dhe arsenaleve të luftës në Ukrainë.
Madje, ka pasur ndaj tij edhe akuza për korrupsion.
Më 3 maj, Instituti amerikan për Studimin e Luftës doli në përfundimin se Putin synon të “kufizojë” fuqinë e ministrit të Mbrojtjes Sergei Shoigu, ta “balancojë” atë dhe ta “dënojë” disi atë që nuk i ka arritur ende objektivat ushtarake të Kremlinit.
Personi i identifikuar nga Putini për këtë objektiv do të ishte guvernatori i rajonit të Tulas, Alexei Dyumin, me të cilin kreu i Kremlinit u takua më 2 maj të kaluar.
Dyumin është një ish-bashkëpunëtor i Wagner dhe mik i liderit të ndjerë Yevgeny Prigozhin, me të cilin ai gjithmonë ka mbajtur anën e hapur me qëllimin për të zënë vendin e Shoigut në Ministrinë e Mbrojtjes.
Burimet e brendshme ruse kanë sugjeruar se Kremlini mund të emërojë Dyumin në një rol të ri të lidhur me industrinë ruse të mbrojtjes.
Mirëpo, me sinjalet e fundit nga Moska, është e qartë se personi i përcaktuar do të jetë Belousov dhe askush tjetër.