Rethi i dytë i zgjedhjeve presidenciale dhe parlamentare që po mbahen sot në Maqedoninë e Veriut mund të ketë një ndikim kyç në shpresat e këtij vendi ballkanik për anëtarësim në Bashkimin Evropian, vlerësojnë mediat belge në lajmet lidhur me zgjedhjet në vend.
Shërbimi belg i transmetimit publik në gjuhën franceze RTBF thekson se “kthimi në pushtet i opozitës së djathtë” mund të rinovojë tensionet me Greqinë dhe Bullgarinë fqinje, veçanërisht me Sofjen, e cila vendos kushtet e veta për përparimin e Maqedonisë së Veriut në negociatat e anëtarësimit.
“Partia nacionaliste e djathtë VMRO-DPMNE, kandidatja e së cilës Gordana Siljanovska-Davkova kishte një avantazh të madh në rrethin e parë të zgjedhjeve presidenciale të 24 prillit, është në rrugë të mbarë drejt fitores edhe në rrethin e dytë, por edhe në zgjedhjet parlamentare”, thekson RTBF.
Sipas televizionit, lideri i partisë Hristijan Mickoski refuzon të njohë emrin e ri të vendit – Maqedonia e Veriut, e përcaktuar nga “marrëveshja historike e nënshkruar në vitin 2018 me Greqinë për t’i dhënë fund mosmarrëveshjes afatgjatë midis Shkupit dhe Athinës”.