Situata në linjat e frontit ukrainas është e vështirë, me një tendencë drejt përkeqësimit.
Alarmin e dha shefi i Shtabit të Përgjithshëm të Ushtrisë Ukrainase, Olexander Syrskyi, i cili me të tjerë zyrtarë, përditësoi Grupin e Kontaktit të Ukrainës të udhëhequr nga Shtetet e Bashkuara të Amerikës. Në një mbledhje online, ushtaraku i lartë u ndal te kushtet e vështira në front ndërsa Ukraina përpiqet të zmbrapsë një pushtim rus më shumë se dyvjeçar.
Po ashtu, Syrskyi raportoi për numrin e madh të sulmeve ajrore ruse kundër infrastrukturës energjetike të vendit dhe i bëri jehonë deklaratave të presidentit Volodymyr Zelensky për shpejtim të ndihmave ushtarake nga Perëndimi.
Ukraina ka nevojë urgjente për raketa, municione, pajisje ushtarake e teknologji luftarake. Falënderojmë përsëri Shtetet e Bashkuara të Amerikës për ndihmën e tyre.
Uashingtoni dëshiron që të ofrojë më shumë armë dhe mbështetje për Ukrainën, siç njoftoi sekretari amerikan i Mbrojtjes, Lloyd Austin, dy ditë më parë. Kujtojmë se të mërkurën e 24 prillit, presidenti amerikan Joe Biden nënshkroi një paketë ndihme prej gati 61 miliardë dollarësh pas disa muajsh grindjeje republikane në Kongres.
Ndërkaq, sulmet ruse nuk ndalen. Orët e fundit u raportua se të paktën katër termocentrale u dëmtuan pasi Rusia sërish synoi Ukrainën me një raund sulmesh masive ajrore.
Nga 32 raketa të lëshuara nga ajri, Deti i Zi dhe toka, 21 u kapën, njoftuan Forcat Ajrore të Ukrainës.
Dy termocentrale u goditën në rajonin juglindor të Dnipropetrovsk, në qendër industriale të vendit.
Sulme u raportuan edhe nga rajonet perëndimore Lviv e Ivano-Frankivsk. Ministria e Energjisë e Ukrainës tha se një fabrikë bitumi dhe një aeroport ushtarak në anën ruse u goditën gjithashtu. Por, nuk ka asnjë konfirmim zyrtar mbi këtë informacion. Lufta ruse në Ukrainë vijon e ashpër prej më shumë se dy vitesh tashmë. Në Kremlin e quajnë “operacion special ushtarak” e nuk pajtohen me fjalën “luftë”. Mijëra ukrainas janë vrarë e miliona u detyruan të zhvendosen.
Presidenti Zelensky, dje iu lut sërish aleatëve të Kievit për kundërajrorë e për furnizim të shpejtë me armë. Zelensky tha se vendi ka nevojë për sasi të mjaftueshme të kundërajrorëve e të armëve të tjera për mbrojtjen e qyteteve të veta e për të triumfuar kundër pushtuesit rus.
Terrori duhet të humbë gjithmonë dhe kushdo që na ndihmon t’i bëjmë ballë terrorit rus, është mbrojtës i vërtetë i jetës!