Pronarët e Romës, Dan dhe Ryan Friedkin njoftojnë se Daniele De Rossi do të mbetet në krye të Romës edhe në sezonin e ardhshëm 2024/25.
Dan dhe Ryan Friedkin njoftuan me një deklaratë zyrtare sot (e enjte) në mëngjes se De Rossi do të qëndrojë në klub edhe përtej kësaj vere.
“Pas takimit të djeshëm pasdite me Daniele De Rossi, ne jemi të kënaqur të njoftojmë se ai do të vazhdojë si trajner i AS Roma pas këtij sezoni dhe për një të ardhme të parashikueshme”, kanë thënë Friedkins në një komunikatë.
“Në mandatin e tij të shkurtër si kryetrajner, ndikimi pozitiv që lidershipi i tij ka sjellë në të gjithë klubin ka treguar historinë e vet”.
“Daniele udhëheq me respekt dhe kurajë, ndërsa forca dhe besimi i tij i rrënjosur në klub janë vërtet në linjë me vlerat, qytetin dhe tifozët e pashembullt të Romës”.
“Ne do të vazhdojmë të punojmë së bashku sa më shumë që të jetë e mundur për të ofruar një të ardhme që tifozët e AS Roma e meritojnë”.
“Nuk mund të ishim më të lumtur sesa të ndërtonim një projekt afatgjatë me Danielen. Detaje të tjera do të vijojnë në ditët në vijim. Forza Roma!”, mbyllet komunikata.
De Rossi zëvendësoi Jose Mourinhon në janar duke nënshkruar një kontratë deri në fund të sezonit. Ai ka fituar 11 ndeshje nga 16 në të gjitha garat me tre barazime dhe dy humbje.