Irani i ka sinjalizuar Uashingtonit se do t’i përgjigjet sulmit izraelit ndaj konsullatës iraniane në Siri në një mënyrë që shmang përshkallëzimin e madh dhe nuk do të veprojë me nxitim, thanë burimet iraniane. Mesazhi u dha nga ministri i jashtëm iranian Hossein Amirabdolakhain gjatë një vizite në Oman, i cili shpesh vepron si ndërmjetës midis Teheranit dhe Uashingtonit, transmeton Portalb.mk.
Shtëpia e Bardhë nuk komentoi mbi akuzat, por tha se SHBA i kishte thënë Iranit se nuk ishte i përfshirë në sulmin në Damask.
Një burim i inteligjencës amerikane tha se Irani ka qenë shumë i qartë se përgjigja e tij do të kontrollohet dhe nuk do të kontribuojë në përshkallëzimin e mëtejshëm dhe se ai planifikon të përdorë grupe rajonale pro-iraniane për të sulmuar Izraelin, si Hezbollahu.
Irani ka kërcënuar se do të hakmerret kundër Izraelit për një sulm ajror të 1 prillit që goditi konsullatën iraniane në Damask, duke vrarë 13 persona, përfshirë gjeneralë të Gardës Revolucionare iraniane. Udhëheqësi suprem Ayatollah Ali Khamenei më vonë tha se sulmi po trajtohej si një sulm në territorin iranian. Izraeli nuk e ka marrë përgjegjësinë për sulmin, por besohet gjerësisht se qëndron pas tij.
Në pritje të një përgjigjeje iraniane, SHBA ka kufizuar lëvizjen e punonjësve të saj në Izrael. Ambasada amerikane rekomandoi që të mos udhëtoni jashtë Jeruzalemit, Tel Avivit dhe Beer Sheva.