Shtetet e Bashkuara të Amerikës thanë se “imazhet e sulmit në sallën e koncerteve në Moskë ishin të tmerrshme dhe thjesht të vështira për t’u parë”. “Mendimet tona, padyshim se do të jenë me viktimat e këtij sulmi të tmerrshëm”, thuhet në reagimin e Shtëpisë së Bardhë.
Uashingtoni ka konfirmuar se në fillim të marsit i ka paralajmëruar autoritetet ruse për një sulm të mundshëm terrorist, që dyshohej se në shënjestër kishte tubimet e mëdha në Moskë.
“Në fillim të këtij muaji, qeveria amerikane kishte informacione për një sulm të planifikuar terrorist në Moskë – që mund të synonte tubime të mëdha, përfshirë koncerte”, thuhet në deklaratën e Këshillit të Sigurisë Kombëtare të SHBA-së.
Uashingtoni e “ka ndarë këtë informacion me autoritetet ruse”, por Kremlini i pati hedhur këto paralajmërimet amerikane, duke i cilësuar si propagandë”, sqaron Këshilli i i Sigurisë Kombëtare.
Bashkimi Evropian ka dënuar sulmin kundër civilëve në Moskë duke u shprehur “i tronditur nga raportet e mediave mbi sulmin në sallën e koncerteve”. “Mendimet tona janë me të gjithë qytetarët e prekur rusë”, tha zëdhënësi i BE-së, Peter Stano. Kryeministrja e Italisë, Girogia Meloni, tha se Qeveria e saj e dënon “këtë akt të urryer terrorizmi”. “Tmerri i masakrës së civilëve të pafajshëm në Moskë është i papranueshëm”, tha Meloni. Sipas Ministrisë së Jashtme të Francës, pamjet nga Moska “janë të tmerrshme”. “Mbi këto akte të urryera duhet hedhur dritë”, thuhet në reagimin e diplomacisë franceze.
Ministria e Jashtme e Gjermanisë kërkon sqarimin e prapavijës së këtij sulmi të rëndë
“Ngushëllimet tona më të thella shkojnë për familjet e viktimave”, thuhet në reagimin e Berlinit zyrtar.
Ukraina, e cila tash e dy vjet lufton kundër pushtimit rus, mohoi të ketë ndonjë rol në sulmin në Moskë
Një këshilltar i presidentit Volodymyr Zelensky, tha se “pavarësisht të gjithave, çdo gjë do të vendoset në fushëbetejë”.