26-vjeçari Sh. H., që vdiq mesditën e së hënës në rrugën “Agim Ramadani” në Prishtinë, është varrosur sot.
Në ceremoninë e varrimit familja e të ndjerit ia ka falur gjakun familjes të së dyshuarës që ka shkaktuar aksidentin.
Nga pamjet që janë publikuar familja Habibaj në prezencë të shehut ia kanë falur gjakun familjes Kllokoqi-Berisha.
“Ky gjak familjes Kllokoqi-Berisha iu fal sot, mos me e çu më gat, e para se me falë xhenazen e djalit. Veç me ia bë hallall, pa ja jep dorën. Në prezencën e burrave këtë punë me ia lënë në dorë të Zotit, por jo na me u marrë me atë punë”, ka thënë shehu prezent.
Kujtojmë se Prokuroria Themelore e Prishtinës ka bërë të ditur se prokurori ka kërkuar caktimin e masës së paraburgimit ndaj të dyshuarës.
Sipas kërkesës për paraburgim, e dyshuara duke drejtuar makinën në mënyrë të pakontrolluar ka goditur shtyllën e semaforit dhe semafori pas rrëzimit e godet këmbësorin Sh. H., i cili si pasojë e lëndimeve vdes në vendin e ngjarjes.