Presidenti amerikan, Joe Biden, ka njoftuar për më shumë se 500 sanksione të reja kundër Rusisë për pushtimin e saj në Ukrainë dhe vdekjen në paraburgim të figurës së opozitës, Alexei Navalny.
Sanksionet do të synojnë individë të lidhur me burgosjen e Navalnyt dhe makinën luftarake të Rusisë, ka thënë Biden, raportoi BBC. Kufizimet e eksportit do të vendosen për rreth 100 firma ose individë.
Në një deklaratë, presidenti Biden ka thënë se sanksionet “do të sigurojnë” që presidenti rus, Vladimir Putin, të paguajë një çmim edhe më të lartë për agresionin e tij jashtë vendit dhe shtypjen në vend
Sanksionet shënojnë një javë që kur Navalny vdiq në një burg të Rrethit Arktik. Bideni ka thënë se nuk mund të ketë “asnjë dyshim” se presidenti rus ishte fajtor.
“Këto sanksione do të synojnë individë të lidhur me burgosjen e Navalny-t, si dhe sektorin financiar të Rusisë, bazën industriale të mbrojtjes, rrjetet e prokurimit dhe shmangësit e sanksioneve nëpër kontinente të shumta. Ata do të sigurojnë që Putini të paguajë një çmim edhe më të lartë për agresionin e tij jashtë vendit dhe shtypjen në vend”, është shprehur Bideni.
BE-ja ka njoftuar gjithashtu sanksione ndaj afro 200 subjekteve dhe individëve të akuzuar se kanë ndihmuar Rusinë të prokurojë armë, ose për përfshirje në rrëmbimin e fëmijëve ukrainas, diçka që Moska e mohon.
Në përgjigje, Ministria e Jashtme e Rusisë ka thënë se kishte zgjeruar ndjeshëm listën e zyrtarëve dhe politikanëve të BE-së të cilëve u ndalohej hyrja në Rusi./alsat