Virozat e stinës boshatisin kopshtet dhe çerdhet në Berat. Deri në 40 përqind e fëmijëve të regjistruar në kopshte e çerdhe, gjatë kësaj periudhe nuk shkojnë për shkak të virozave. Nga ana tjetër, mjeku pediatër tregon se fatmirësisht në Berat nuk ka fëmijë të prekur nga fruthi
Virozat e stinës, që kanë filluar që prej fillimit të vitit 2024 duke prekur çdo grupmoshë, tashmë janë përqendruar tek fëmijët e vegjël.
Në 39 kopshtet dhe 4 çerdhet që ndodhen në të gjithë territorin e bashkisë Berat, frekuentimi i fëmijëve është në masën 60%, ndërkohë që 40% e fëmijëve janë të prekur nga virozat. Lajmi bëhet i ditur nga Drejtoresha e Drejtorisë Arsimore në bashkinë Berat, Klodiana Hoxha.
Teksa konfirmon situatën me virozat, mjeku pediatër Vladimir Kumaraku, tregon se prindërit duhet të rrinë të qetë se deri tani në Berat nuk ka raste të fëmijëve të prekur nga fruthi.
Edhe në qytete të tjera të vendit, situata me virozat te fëmijët vijon të jetë problematike.