“Unë nuk do të kem rritje të pagës, sepse unë me 28 janar do të ketë seancë në Kuvend ku do të hyjë në fuqi Qeveria teknike, me kryeministër teknik”.
Këtë e tha mes tjerash kryeministri Dimitar Kovaçevski i pyetur nëse edhe ai do të marrë pagë 400 euro më të madhe. I pyetur për zgjidhjen ligjore për uljen e pagave te funksionarët, Kovaçevski thotë se e ka pyetur grupin e punës dhe se të njëjtit kanë thënë se po punojnë për propozimin që duhet të dorëzohet në Kuvend.
“Rreth pagave të funksionarëve të zgjedhur dhe të emëruar, kryetar komunash, gjykatës, prokurorë, deputetë, drejtorë, 21 ministra, sa i përket kësaj, ka grup pune që punon në propozim që duhet të dorëzohet në Kuvend dhe Kuvendi ta thotë fjalën e fundit”, shtoi Kovaçevski.
Ndryshe, nga ky muaj funksionarët në RMV do të marrin paga më të larta për 400 euro, kjo për shkak të rritjes së pagës mesatare në vend në vitin 2023. Këto 400 euro janë vetëm një plotësim i rritjes prej 78 për qind, e cila tashmë është marrë nga rreth dy mijë persona që nga prilli, duke përfshirë presidentin, kryeministrin, ministrat, deputetët, kryetarët e komunave, gjyqtarët dhe të tjerët.