Gazeta “HuffPost”, e ka renditur Tiranën, kryeqytetin e Shqipërisë, si një nga destinacionet më të mira për të kaluar pushimet në vitin 2024.
Kryeministri, Edi Rama ka postuar në rrjetin social Facebook artikullin i cili flet për mundësinë për të kaluar pushimet në Tiranë, së bashku me disa foto të cilat pasqyrojnë kryeqytetin shqiptar.
“Vit pas viti, udhëtarët amerikanë dynden drejt destinacioneve si Parisi, Kankun dhe Londra. Ndërsa këto vende janë të njohura për një arsye, ka shumë vende të tjera në zhvillim për të tërhequr më shumë turistë në të ardhmen”, shkruan HuffPost.
Megjithatë, Tirana ende nuk është destinacion i pushuesëve, mirëpo ata kanë shkruar se mund të jetë një destinacion ideal për dikë që kërkon diçka më ndryshe.
“Shumica e njerëzve ende nuk e kanë zbuluar atë, por fluturimet dhe infrastruktura turistike janë në përmirësim, dhe ka më pak turma në krahasim me destinacionet në trend evropian si Italia, Greqia apo Portugalia,” tha Laura Lindsay, eksperte e tendencave të udhëtimit global në Skyscanner. “Plazhet e bukura të Rivierës Shqiptare dhe kostoja më e lirë e jetesës e bëjnë atë një destinacion të shkëlqyeshëm për verën. Shqipëria ka qytete historike për t’u eksploruar dhe një skenë festivalesh në zhvillim, me ngjarje që zënë vendin e tyre në të gjithë kalendarin muzikor botëror”, shkruhet në artikull.