Redaktorja e poezisë në “New York Times”, Anne Boyer reagoi ndaj lajmeve të gazetës në fjalë për sulmet e Izraelit në Gaza me fjalët “Jo më gënjeshtra luftarake” dhe dha dorëheqje, transmeton Anadolu.
Në letrën e saj të dorëheqjes të publikuar në faqen e saj personale, Boyer tha: “Lufta e Izraelit e mbështetur nga SHBA-ja kundër popullit të Gazës nuk është në interesin e askujt”.
Duke thënë se nuk ka siguri në këtë luftë për Izraelin, SHBA-në, Evropën dhe veçanërisht popullin hebre, Boyer tha: “Kjo luftë u shërben vetëm fitimeve vdekjeprurëse të prodhuesve të naftës dhe armëve”.
Në letrën e saj të dorëheqjes, Boyer tha: “Bota, e ardhmja jonë, zemra jonë po bëhet gjithnjë e më e vështirë për shkak të kësaj lufte. Kjo nuk është vetëm një luftë raketash dhe pushtimi tokësor. Kjo është një luftë kundër popullit palestinez që ka rezistuar për dekada ndaj pushtimit, shpërnguljes së detyruar, privimit, kontrolleve, rrethimeve, burgosjeve dhe torturave”.
“Nëse kjo dorëheqje lë boshllëk sa një poezi në botën e lajmeve, kjo është forma e vërtetë e momentit”
Boyer tha se ndonjëherë mënyra më produktive e protestës për artistët është “refuzimi”.
“Nuk mund të shkruaj poezi me tone të ‘arsyeshme’ që synojnë të na mësojnë me këtë klimë vuajtjeje irracionale. Jo më eufemizma të neveritshme. Nuk ka më peizazhe ferri të pastruara me fjalë. Nuk ka më gënjeshtra luftarake. Nëse kjo dorëheqje lë boshllëk sa një poezi në botën e lajmeve, kjo është forma e vërtetë e momentit”, tha Boyer në letrën e saj.