Kryetarja e qytetit të Shkupit, Danela Arsovska, sot ka inspektuar dhe promovuar rrugën e rikonstruktuar Nikolla Karev, nga kryqëzimi me bulevardin Kuzman Josifovski Pitu deri në kryqëzimin me rrugën Gjuro Gjonoviq.
– Vetëm një javë pas fillimit të punimeve në rrugën Nikolla Karev në qendër të Shkupit, e cila ishte në gjendje të keqe, është rikonstruktuar tërësisht. Kemi punuar me dinamikë të përshpejtuar për të shmangur bllokimin e trafikut në këtë pjesë të qytetit, duke pasur parasysh faktin se është një rrugë e frekuentuar që lidh disa rrugë kryesore dhe ndodhet në afërsi të stacionit të autobusëve dhe hekurudhave ndërqytetëse. Me realizimin e këtij projekti po realizojmë edhe një premtim nga programi “Për Shkup modern”, sepse nevojat e qytetarëve janë prioriteti ynë – theksoi kryetarja Arsovska.
Në rrugën “Nikolla Karev” është bërë rikonstruksioni i rrugës në një sipërfaqe prej 3800 metrash katrorë, janë rrafshuar pusetat dhe kanalizimet, si dhe është vendosur sinjalistika përkatëse horizontale dhe vertikale. Punimet ndërtimore janë kryer nga ekipet e ndërmarrjes publike “Rrugë dhe rrugica”.
