A mundet që një frut i vetëm të reduktojë në mënyrë drastike dhe shpejt depozitat yndyrore në arterie, duke reduktuar rrezikun e sulmit në zemër dhe goditjes në tru?
Po, sipas shkencëtarëve japonezë, një tas me luleshtrydhe të freskëta është në gjendje të “shpërndajë” akumulimin e tepërt të yndyrës në arterie, duke mbrojtur nga sëmundjet e zemrës. Përfundimet e reja shkencore janë publikuar në Journal of Nutrition Science.
Një përqindje e madhe e njerëzve në mbarë botën kanë kolesterol të lartë, një gjendje aspak e “pafajshme”, e cila rrit në mënyrë dramatike rrezikun e sëmundjeve të zemrës. Në veçanti, kolesteroli i lartë dhe veçanërisht kolesteroli “i keq” LDL përkthehet në depozitime të larta yndyrore në arterie. Këto përqendrime të lipideve mund të bllokojnë arteriet, duke shkaktuar ngushtim dhe mbyllje të enëve të gjakut. Mpiksjet që formohen më pas mund të shkaktojnë një sulm në zemër ose goditje në tru. Sipas studiuesve nga Universiteti Setsunan në Osaka, Japoni, luleshtrydhet, një frut i pasur me vitaminë C, mund të parandalojnë akumulimin e yndyrës duke mbrojtur kështu nga rreziku i ngjarjeve serioze kardiovaskulare.
Pasi përcaktuan përfitimet e luleshtrydheve në shëndetin kardiovaskular, studiuesit japonezë donin të hetonin se si ndikojnë drejtpërdrejt këto veti të dobishme të frutave në trupin e njeriut.
Për këtë arsye, ata ekzaminuan një grup vullnetarësh, të përbërë nga 23 gra të reja të shëndetshme. Vullnetarët u ndanë në dy grupe. Njërit grup iu dha një pure prej 500 gramësh luleshtrydhe, ndërsa tjetrit një pije me sheqer. Gjysmë ore pasi pjesëmarrësit konsumuan produktin e dhënë, studiuesit mblodhën mostra gjaku. I njëjti proces i pirjes dhe nxjerrjes së gjakut përsëritej çdo 30 minuta për 4 orë të tjera.
Rezultatet e matjeve zbuluan se grupi që kishte konsumuar purenë e luleshtrydheve kishte përqendrime dukshëm më të ulëta të lipoproteinës me densitet të ulët, ose kolesterolit “të keq” LDL, sesa grupi që konsumoi pije me sheqer. Në fakt, ky efekt u bë i dukshëm tashmë një orë pas ngrënies së luleshtrydhes për herë të parë, ndërsa zgjati të paktën 4 orë pas përfundimit të testit.
Duke komentuar mbi gjetjet, ekipi hulumtues tha: “Luleshtrydhet janë një burim i rëndësishëm i lëndëve ushqyese dhe studimet tregojnë se konsumi i lartë i frutave të tilla lidhet me një rrezik të reduktuar të sëmundjeve kardiovaskulare”.