Kryeministri i Kosovës, Albin Kurti ka deklaruar sot se janë duke shqyrtuar kërkesat e Policisë së Kosovës, lidhur me Ligjin e pagave, rrezikshmërinë në punë, e kërkesa tjera që kanë parashtruar para pak ditësh.
Kurti tha se policia ka mbështetjen e Qeverisë së Kosovës, transmeton Telegrafi.
“Kjo është një çështje që ne e kemi konsideruar me intensitet të lartë dhe po punojmë intensivisht. Duhet t’i ndajmë nevojat, meritat dhe dëshirat dhe gjithashtu duhet të kemi kategorizim, klasifikim e sistematizim të kujdesshëm që të mos krijojmë pabarazi shtesë. Unë personalisht jam duke u marrë me këtë temë veç na duhet edhe pak kohë që të mos bëjmë gabime që do të shkaktojmë zhgënjime e pendesa.
Edhe kur e patëm bërë ligjin për paga, ka marrë më shumë kohë se sa patëm menduar fillimisht, mirëpo koha shtesë që e morëm ia ka vlejtur për shkak se i kemi minimizuar maksimalisht defektet në vijim, andaj unë këtë e kam prioritet të lart dhe iu siguroj që po bëj krejt çka mundem dhe dijë. Policia e Kosovës, organet tona në përgjithësi të sigurisë janë në nivel të detyrës dhe e kanë mbështetjen e Republikës së Kosovës. Nevojat, meritat janë më të thjeshta. Zgjidhja është më komplekse dhe na jepni edhe ca më shumë kohë që mos të bëjmë asnjë gabim ose defekt”, tha ai.
Ndryshe, Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione ka pranuar një peticion me dhjetë kërkesa nga Sindikata e Policisë së Kosovës.
Kërkesat e sindikatës janë Ligji i pagave, shtesa e rrezikshmërisë në punë, shtesa për punë të veçantë, klasifikimi në koeficient për stafin civil, shujta mujore, shpërblimi për fund-vit për performancë të mirë, tri paga përcjellëse për të pensionuarit, zbritja e përvojës së punës nga 0.5 në 0.25 për 15 vitet e para, sigurimi shëndetësorë dhe jetësor si dhe Ligji për pensionim në Policinë e Kosovës. /Telegrafi/