Në pikëpagesat rrugore, mbi 14,500 euro të falsifikuara.
Për 30€ ofrohen 400€ me nga 2€ të falsifikuara, Për 40€ ofrohen 800€, dhe për 50€ deri në 1500€ të cilat të arrijnë edhe në adresë. Dhe kjo është njëra nga ofertat e shumta online në rrjetet sociale.
Një qytetar denoncoi në Alsat se ka rënë pre e këtij lloj mashtrimi. Pasi ka pranuar 2 euro të tilla e ka kuptuar se janë të falsifikuara pasi në këmbimore e kanë informuar se nuk janë origjinale. Tentuam të marrim informata shtesë nga pronaret e këmbimoreve se si mund t’i dallojmë këto dy euro të falsifikuara. Ata nuk deshën të flasin para kamerave, por sqaruan disa nga metodat se si dallohen monedhat e flasifikuara.
“Në duar mbaj dy nga dy euro prej të cilave njëra është e falsifikuar ndërsa tjetra është origjinale dhe sipas pronarëve të këmbimoreve mënyra e vetme për tu dalluar është me magnet dhe siç mund të shihni origjinali rrotullohet dhe nuk mbetet e ngjitur në magnet ndërsa e falsifikuara është e ngjitur dhe nuk lëvizë. Kjo është njëra ndër mënyrat se si dallohen dy eurot por se sa është e lehtë për tu blerë këto euro, nëse vetëm shkruani para të falsifikuara në rrjetet sociale do të gjeni qindra të tilla”, raporton Avni Tahiri, gazetar.
Nga Ministria e Punëve të Brendshme konfirmuan se kanë pranuar denoncime për dy euro të falsifikuara dhe më së shumti nga pikëpagesat e rrugëve shtetërorë dhe atë gjatë sezonit të verës. Nga ndërmarrja e Rrugëve Shtetërore konfirmuan se janë evidentuar monedha të falsifikuara jo vetëm nga 2 por edhe nga 1 euro me vlerë totale prej 14,533 eurosh.
“Sipas të dhënave tona për periudhën nga 22.11.2022 deri më 31.07.2023, janë detektuar gjithsej 7141 copë monedha nga 2 euro të falsifikuara me vlerë totale prej 14,282 mijë euro dhe 251 copë monedha nga 1 euro të falsifikuara me vlerë 251 euro. Në total, të falsifikuara janë detektuar 14 533 euro”, njoftojnë nga N.P. Rrugët Shtetërore të RMV-së.
Nga rrugët shtetërorë shtojnë se për të mbrojtur punonjësit e pikave të pagesave nga dukuri të tilla, i sigurojnë të gjitha të ardhurat nga pikat e pagesave në kompani sigurimi, nëpërmjet të cilave më pas bëjnë rikthimin, me të cilat kompensohet çdo punonjës i pikave të pagesës.