Sindikata e United Auto Workers (UAW) ka njoftuar se 8.700 punëtorë kanë hyrë në grevë duke mbyllur fabrikën më të madhe të Fordit në Shtetet e Bashkuara të Amerikës, shkruan BBC.
UAW ka thënë se punëtorët u larguan nga fabrika e kamionëve në Kentucky, në përgjigje të refuzimit të Fordit për të vazhduar më tej në negociatat e kontratave.
Është përshkallëzim i grevave që goditën Fordin, General Motorsin dhe Stellantisin, që nga muaji i kaluar.
UAW-i po u bën presion prodhuesve të veturave që të japin paga më të larta dhe të bëjnë përmirësime të tjera në marrëveshjet e reja të punës.
Është greva e parë në historinë 88-vjeçare të sindikatës që synon prodhuesit e automjeteve të “Treshes së madhe” në të njëjtën kohë. Mbi 140 mijë punëtorë të sindikatës janë në këto tre kompani.
UAW-i përfaqëson më shumë se 400 mijë punëtorë aktivë në një gamë të gjerë sektorësh, duke përfshirë spitalet dhe universitetet.
Fabrika e kamionëve të Fordit në Kentucky gjeneron 25 miliardë dollarë të ardhura vjetore, duke përbërë një të gjashtën e të ardhurave globale të automjeteve të kompanisë.
Greva e fundit është një paralajmërim për General Motorsin dhe Stellantisin, ku negociatat me UAW-in janë në vazhdim.
Dy javë më parë, presidenti amerikan Joe Biden u bë presidenti i parë në detyrë i SHBA-së që iu bashkua një greve të punëtorëve të veturave.