Një serb i arrestuar dje në Brazil është identifikuar si një nga drejtuesit e kartelit ballkanik dhe është Aleksandar Neshiç, i cili jeton prej vitesh atje.
Një nga trafikantët më të rëndësishëm të drogës në Evropë është arrestuar në Brazil gjatë një operacioni të Policisë Federale. Aleksandar Neshiç u gjet në bregdetin e Sao Paulos, ku po zhvillonte negociata për eksportin e kokainës përmes portit të Santos.
Ky tregtar droge e mori rolin nga babai i tij Goran Neshiç, i cili u ekstradua në Serbi në vitin 2018. Goran Neshiç njihet edhe si “mbreti i kokainës” dhe “don i kokainës”, për shkak të lidhjeve të tij të forta brenda kartelit të drogës.
Të dy u dërguan në Brazil nga një grup kriminal i udhëhequr nga Darko Shariç.
Pas një viti e gjysmë pune të vështirë të përbashkët nga policia në të dy anët e Oqeanit Atlantik, policia braziliane më 5 tetor bastisi shumë vende dhe arrestoi 16 persona, disa prej të cilëve dyshohet se ishin të lidhur me kartelin kriminal “Primeiro Comando da Capital”.
Biznesi i PCC me një grup kriminal nga Ballkani u zbulua tashmë në hetimet e Departamentit të Policisë dhe Prokurorisë së Shtetit në Sao Paulo.
PCC e dërgon kokainën në Evropë, ku ajo merret nga grupe të lidhura me mafian italiane nga Kalabria, e njohur si ‘Ndrangheta, e cila është përgjegjëse për logjistikën e dërgimit të drogës në vendet e Evropës Lindore. Vetëm pas kësaj, kokaina shpërndahet përmes serbëve.
Hetimi filloi kur 5.5 ton kokainë u sekuestruan në një anije peshkimi braziliane në brigjet e Afrikës. Pas kësaj, një tjetër sekuestrim i dy tonëve drogë u bë në një anije peshkimi në ujërat ndërkombëtare.
Kokaina e dërguar nga serbët është transportuar nga peshkatarët dhe ka mbërritur në anijet e peshkimit në det të hapur. Sipas Policisë Federale, Aleksandar Neshiç ka qenë ai që ka negociuar me PCC-në dhe ka koordinuar logjistikën.