Një hetim është hapur për marrëdhëniet e dyshimta të Juventusit me agjentët, që dyshohet se i paguanin ata për marrëveshje në të cilat nuk ishin përfshirë. Mediumi italian “La Repubblica” detajon se si Sekretariati i Komisionit të Agjentëve ka hapur një hetim për “Zonjën e Vjetër” pas detajeve që dolën nga hetimi i Prisma, me nofkën ‘Agentopoli’.
Janë zbuluar një sërë faturash për marrëveshje, në të cilat gjithsesi janë paguar agjentë të caktuar që nuk kanë pasur asnjë rol. Akuza sugjeron se këta agjentë janë futur si ndërmjetës në marrëveshjet në të cilat nuk kanë pasur asnjë përfshirje për të shlyer borxhet e rënë dakord më parë.
Mes agjentëve të përfshirë janë disa emra të shquar në botën e futbollit italian, duke përfshirë Davide Lipi, Gabriele Xhiufrida, Xhiusepe Galli, Vinçenzo Morabito, Mishele Fioravanti dhe Tullio Tinti.
Dokumentet e mbrojtjes së agjentëve duhet të dërgohen deri sot, pas së cilës CAS (Komisioni i Agjentëve Sportiv) do të vendosë nëse do të sanksionojë ose jo palët e përfshira. Hetimi për Juventusin është ende në vazhdim, por po ecën përpara ngadalë, pa asnjë vendim që pritet deri në vitin 2025.