Te Manchester United nuk i preferojnë rebelët që ngrenë zërin kundër klubit ose trajnerit.
Fati që ndoqi Cristiano Ronaldon, i cili shprehu publikisht rezervat pas krisjes në raportin e tij me teknikun holandez Erik Ten Hag duket se po ndjek edhe yllin e kombëtares angleze, Jadon Sancho.
Talenti 23-vjeçar është dëbuar nga skuadra e parë e Manchester United pasi refuzoi t’i kërkonte falje trajnerit pas përplasjes së tyre publike.
Sancho sulmoi holandezin në mediat sociale, javën e kaluar, pasi Ten Hag la të kuptohej se ai ishte larguar nga ekipi si rezultat i paraqitjeve të dobëta në stërvitje.
Ylli i Anglisë i quajti pretendimet “të pavërteta” duke u shprehur se po e bëjnë “kokë turku”.
Pas situatës së krijuar në Carrington, “Djajtë e Kuq” lëshuan një deklaratë të enjten pasdite ku thuhet se Sancho do të stërvitet larg shokëve të skuadrës derisa çështja të zgjidhet.
“Jadon Sancho do të mbetet në një program stërvitor personal larg grupit të ekipit të parë, në pritje të zgjidhjes së një çështjeje disiplinore të skuadrës“, thuhet në reagimin e klubit.