Filmat amerikanë “Barbie” dhe “Openheimer”, dy nga sukseset më të mëdha të kinematografisë në nivel global, bien ndesh me politikën e Rusisë për “forcimin e vlerave tradicionale dhe shpirtërore”, tha sot Moska, përmes një deklarate nga Ministria e Kultura.
Sipas Novaya Gazeta, njoftimi i ministrisë është një përgjigje ndaj propozimit të bërë në fillim të gushtit nga Vladislav Davankov, nënkryetar i Dumës së Shtetit, i cili i referohej shfaqjes së paligjshme (d.m.th. pa lejen e studiove) të filmave të prodhuar nga “vendet armike” në kinemanë ruse. Qëllimi i këtij propozimi ishte të lejonte qytetarët rusë të shihnin filma amerikanë si “Barbie” dhe “Oppenheimer”, duke anashkaluar “bojkotin e tregut rus” të Hollivudit.
Duke iu referuar këtij propozimi, zëvendësministri i Kulturës Andrey Malyshev, tha sot se “ne besojmë se dy filmat, “Barbie” dhe “Oppenheimer”, nuk përputhen me synimet që presidenti ynë ka vendosur për forcimin e vlerave morale dhe tradicionale të qytetarëve”.
Malyshev gjithashtu theksoi se në kinematë ruse ka një përzgjedhje të madhe të filmave cilësorë të prodhimit vendas, si filmi “Sfida” i cili u xhirua pjesërisht në Stacionin Ndërkombëtar të Hapësirës dhe “Martiri”, një film propagandistik rus për pushtimin e Ukrainës, i cili mesa duket nuk ka sukses, pavarësisht një buxheti prej 1.9 milionë eurosh dhe mbështetjes nga Ministria e Kulturës.