Dita e diel nuk ishte ditë pushimi për policinë. Ministria e Punëve të Brendshme njoftoi se vetëm gjatë ditës së djeshme policia ka sanksionuar 666 shoferë në tërë territorin e vendit, të cilët kanë lëvizur me shpejtësi më të madhe se ajo e lejuara, duke mos kursyer edhe në vendet e banimit.
MINISTRIA E PUNËVE TË BRENDSHME
“Në këtë aksion janë sanksionuar 666 shoferë, prej tyre dyzet e pesë shoferë kanë qarkulluar me shpejtësi mbi 50 km në orë nga shpejtësia e lejuar, kurse shtatë shoferë kanë qarkulluar me shpejtësi mbi 70 km në orë nga shpejtësia e lejuar. Poashtu është konstatuar se 349 shoferë e kanë tejkaluar shpejtësinë e qarkullimit në vende të banimit kurse 317 shoferë jashtë vendeve të banimit”.
Ndërkaq, nga MPB gjithashtu informojnë se vetëm në territorin e qytetit të Shkupit janë shqiptuar gjithsej 177 sanksione, prej të cilave 86 gjoba për tejkalimin e shpejtësisë së lejuar, 14 gjoba për ngasjen e automjetit pa patentë shoferë, 4 sanksione për kundërvajtje të cilat i kryejnë shoferët e motoçikletave.
Përndryshe, në mos respektimin e rregullave të komunikacionit, muaj gusht do të mbahet mend për aksidente të shumta që kanë ndodhur në trafik, që fatkeqësisht disa prej tyre kanë përfunduar me fatalitet.