Kryeministri Dimitar Kovaçevki bashkë me zëvendëskryeministrat dhe ministrat, i është drejtuar publikut – akuzoi opozitaren VMRO-DPMNE që për interesa personale bllokon ardhmërinë evropiane të shtetit dhe jetesën më të mirë të qytetarëve, transmeton TV21.
“Sot sërish u vërtetua se ideologjia e vetme e VMRO-DPMNE-së është – bllokadë dhe izolim, dhe këtë qytetarët pro-evropian as nuk do harrojnë dhe as do ta falin. Kjo bllokadë nuk ka arsye të ndodh. VMRO-DPMNE tregoi se nuk ka argumente, se nuk ka ide për diskutim dhe se nuk udhëhoqën debat. Ata dëshmuan se janë të gatshëm ta bllokojnë ardhmërinë evropiane të vendit për interesa personale dhe kundër jetës më të mirë të qytetarëve dhe kundër qëllimit strategjik – anëtarësimit të plotfuqishëm në BE”, tha Kovaçevski.
Ai tha se VMRO dëshmoi se nuk është as për marrëveshje të re ndërkombëtare.
“Është e qartë se ata nuk duan marrëveshje të re, por thjesht të bllokojnë procese për qëllime personale”, tha Kovaçevski./TV21