LONDËR, 16 gusht /ATSH-DPA/ – Anglia po përballet me një urgjencë të shëndetit mendor, paralajmëroi një organizatë bamirëse, pasi shifrat zbuluan se numri i fëmijëve dhe të rinjve të referuar në njësitë e kujdesit është trefishuar në katër vjet.
“YoungMinds” gjithashtu i bëri thirrje qeverisë të marrë masa për situatën e përshkallëzuar.
Analiza e të dhënave të Shërbimit Shëndetësor Kombëtar (NHS) nga shoqata bamirëse zbuloi se kishte 3 732 referime urgjente në shërbimet e shëndetit mendor për personat nën 18 vjeç, në fund të majit.
Shifra është më shumë se trefishi i 1 322 referimeve urgjente të regjistruara për të njëjtën grupmoshë në maj 2019.
Laura Bunt, shefe ekzekutive e “YoungMinds” tha se statistikat janë alarmante.
“Ata janë tregues i një sistemi të prishur dhe një qeverie që ka refuzuar të dëgjojë të rinjtë që kërkojnë ndryshim”, shtoi ajo.
“Tani jemi në një emergjencë të shëndetit mendor dhe qeveria duhet të kontrollojë shkallën e kësaj krize”, theksoi Bunt.
“Pas këtyre shifrave janë të rinjtë që kanë një nevojë urgjente për mbështetje, duke u përballur me një grup unik presionesh për një brez që po rritet, duke jetuar përmes një pandemie, një krize të kostos së jetesës dhe paqëndrueshmërisë së vazhdueshme globale’, tha ajo.
“Shumë të rinj duhet të presin muaj e vite për të pasur ndihmë, ndërsa shumë të tjerëve u thuhet se nuk e përmbushin pragun për t’u referuar në shërbimet e shëndetit mendor. Asnjë i ri nuk duhet të lihet në pritje të ndihmës ndërsa shëndeti i tyre mendor përkeqësohet”, tha Bunt.