Mijëra ushtarë dhe policë ekuadorianë janë përfshirë në një operacion për të çuar një udhëheqës famëkeq bande në një burg të sigurisë maksimale.
Jose Adolfo Macias, i njohur si “Fito” akuzohet se ka dërguar kërcënime me vdekje ndaj kandidatit të vrarë presidencial të Ekuadorit, Fernando Villavicencio.
Aktivisti kundër korrupsionit u qëllua tre herë në kokë teksa po largohej nga një tubim i fushatës të mërkurën.
Përpara vrasjes së tij, Villavicencio tha se ishte kërcënuar nga Fito.
Vdekja e tij ka tronditur një komb që i ka shpëtuar kryesisht dhunës së bandave të drogës, luftërave të karteleve dhe korrupsionit që ka goditur shumë nga fqinjët e tij.
Megjithatë, krimi është rritur në vitet e fundit, i nxitur nga rritja e karteleve kolumbiane dhe meksikane të drogës.
Të shtunën, partia e tij Construye shpalli kandidaten, Andrea Gonzalez.
Karriera e Gonzalez është fokusuar kryesisht në çështjet mjedisore dhe partia tha se ajo do të “garantonte trashëgiminë” e Villavicencio.
Ndërkohë, e veja e Villavicencio, Veronica Sarauz tha se ajo e konsideronte shtetin përgjegjës për vdekjen e burrit të saj dhe tha se ishte e pakënaqur që Gonzalez ishte emëruar si zëvendësuesja e burrit të saj për të konkurruar në zgjedhje.
Fushata e Villavicencio u fokusua te korrupsioni dhe droga.
Ai ishte një nga kandidatët e vetëm që pretendoi lidhje mes krimit të organizuar dhe zyrtarëve të qeverisë ekuadoriane.
Një ditë para vrasjes së tij, ai u ankua në Zyrën e Prokurorit Publik për parregullsi të dyshuara në kontratat e naftës të negociuara gjatë administratës së ish-presidentit Rafael Correa, të cilat i kishin kushtuar vendit 9 miliardë dollarë amerikanë.
Gjashtë kolumbianë janë arrestuar në lidhje me vrasjen, ndërsa një i shtati u vra në një shkëmbim zjarri.
Autoritetet nuk kanë thënë se kush i ka punësuar dhe paguar vrasësit./koha