Shkup, 10 gusht – Drejtoria doganore ka nisur një fushatë për ngritjen e vetëdijes për rreziqet e korrupsionit në mënyrë që qytetarët apo punonjësit që janë dëshmitarë të korrupsionit apo aktiviteteve të dyshimta të denoncojnë atë.
Në kuadër të fushatës “Stop Korrupsionit”, nga data 9 deri më 17 gusht do të shpërndahen broshura nëpër pika kufitare, përmes të cilave qytetarët do të mund të informohen për mënyrat e denoncimit të korrupsionit, si dhe për pasojat e dëmshme që ai shkakton. “Paraqitë në 197, linjë e hapur e Drejtorisë doganore. Korrupsioni është i dyanshëm – dhënia dhe marrja e ryshfetit është krim. Minimi i sigurisë kombëtare, humbjet nga taksat dhe ulja e investimeve të huaja direkte janë vetëm disa nga pasojat e dëmshme të shkaktuara nga korrupsioni”, janë disa nga mesazhet e theksuara në broshurë.
Fushata për ngritjen e vetëdijes publike për raportimin e rasteve të korrupsionit, konfliktit të interesit dhe keqpërdorimit të detyrës zyrtare nga doganierët do të realizohet në degët e brendshme në mbarë vendin dhe në vendkalimet kufitare Bogorodicë, Novosellë, Dojran, Tabanoc, Dellçevë, Bllacë, Aeroporti i Shkupit dhe Qafë Thanë.