Një rast i ri i etheve hemorragjike Kongo-Krime është regjistruar në vend. Virusi u konfirmua te një punonjës i Klinikës Infektive në Shkup, i cili ishte në kontakt me 27-vjeçaren nga Shtipi, e cila vdiq pas pickimit të rriqrës dhjetë ditë më parë. Punonjësi nga klinika është kategorizuar si kontakt me rrezik të mesëm dhe simptomat janë shfaqur në ditën e nëntë pasi është vënë nën mbikëqyrje mjekësore. Nga Ministria e Shëndetësisë thonë se pacienti është i shtruar në spital dhe personat me të cilët ka qenë në kontakt janë vendosur gjithashtu nën mbikëqyrje. Ministria rikujton se fillimi i sëmundjes është i menjëhershëm, me dhimbje koke, temperaturë të lartë, dhimbje në shpinë, kyçe, stomak dhe të vjella. Me përparimin e sëmundjes, në trupin e pacientit shfaqen mavijosje, si dhe gjakderdhje nga hunda. Rikuperimi është i ngadaltë. Vdekshmëria nga ethet hemorragjike Kongo-Krime është 40 për qind.