Ekonomistët presin një rritje të fortë të çmimeve të pasurive të paluajtshme në mbarë botën – një mesatare prej 9% në vit gjatë dhjetë viteve të ardhshme. Arsyet për këtë, ndër të tjera, janë standardi më i lartë i jetesës dhe rritja e popullsisë.
Ekonomistët presin që çmimet e pasurive të paluajtshme në botë të rriten fuqishëm në 10 vitet e ardhshme. Në nivel global pritet një rritje mesatare prej rreth 9% në vit, sipas hulumtimit të Institutit Mynih Ifo dhe Institutit për Politikat Ekonomike Zvicerane. Të dy institutet kërkuan mendimin e 1405 ekspertëve nga 133 vende.
Sipas rezultateve të hulumtimit, në Gjermani pritet një rritje prej 7,2%, në Austri 6,9%, në Zvicër 4,8%. “Performanca e çmimeve do të nxitet më shumë nga faktorët e lidhur me kërkesën sesa nga oferta,” thotë studiuesi i Ifo-Institute Timo Wohner.
Arsyet e rritjes së çmimit
Rritja e standardeve të jetesës, të ardhurat më të larta, si dhe dëshira për më shumë hapësirë jetese dhe rritje të popullsisë janë duke nxitur kërkesën në tregun e pasurive të paluajtshme në mbarë botën, thanë 37 për qind e ekspertëve të anketuar. Përveç kësaj, prirja në rritje për të punuar nga shtëpia luan një rol.
“Për 27 për qind të ekspertëve, faktorët e ofertës, si kapacitetet e kufizuara prodhuese, çmimet më të larta të materialeve të ndërtimit dhe mungesa e tokës ndërtimore, janë përgjegjës për rritjen e çmimeve të pasurive të paluajtshme”, thotë Wohner. Dymbëdhjetë për qind e të anketuarve e shohin politikën monetare të bankës qendrore, inflacionin dhe politikën e qeverisë si nxitës të rritjes së pritshme të çmimeve.