Mes stërvitjes dhe ndeshjeve miqësore, Roma vijon përgatitjet për sezonin e ri.
Verdhekuqtë morën dy konfirmime të rëndësishme për vazhdimësinë siç janë trajneri Jose Mourinho dhe sulmuesi Paulo Dybala, dy personazhe që do të mbeten në kryeqytetin italian të paktën edhe për sezonin e ardhshëm.
Megjithatë, tekniku portugez ka shfaqur edhe pakënaqësitë e para ndaj drejtuesve të klubit pasi kërkon sa më shpejt dy lojtarë. Një sulmues dhe një mesfushor. Mourinhos i duhet një zëvendësues për Tammy Abraham që është dëmtuar dhe një mesfushor që të zëvendësojë Gini Wijnaldum që u rikthye te Paris Saint-Germain.
Emrat që qarkullojnë janë të shumtë, por ata që përfliten më së shumti janë Renato Sanches, Gianluca Scamacca dhe Alvaro Morata. Tashmë, “The Special One” është lodhur dhe pret që drejtuesit të lëvizin në mënyrë konkrete për të transferuar dy prej emrave të sipërpërmendur ndërsa i kërkon sa më shpejt në organikë që më pas t’i integrojë me pjesën tjetër të skuadrës.
Sezoni i ri është “pas dere” dhe Mourinho e di mirë rëndësinë e grupit dhe kërkon ta ketë atë të plotë sa më parë.