Armenia dhe Azerbajxhani njoftuan të premten për të vrarë në luftimet përgjatë kufirit ndërmjet tyre, në veriperëndim të rajonit separatist Nagorno-Karabakh.
Ministria e Mbrojtjes e Armenisë tha se dy ushtarë të saj kanë mbetur të vrarë dhe një tjetër është plagosur pranë fshatrave kufitare Sotk dhe Norabak. Azerbejxhani fajësoi Armeninë se ka sulmuar me dronë pozicionet e saj përtej kufirit, në rajonin e Kalbajarit, duke plagosur tre ushtarë të tij.
Ndërkohë, Armenia tha se Azerbajxhani po shtonte numrin e forcave në afërsi të kufirit, dhe se po sulmonte pozicionet e saj me dronë, predha dhe të shtëna nga armë të lehta. Azerbajxhani mohoi se po shtonte numrin e trupave përgjatë kufirit, por deklaroi se po ndërmerrte “masa kundërpërgjigjëse”.
Agjencia Reuters nuk arriti t’i konfirmojë këto njoftime.
Nagorno-Karabakh, që ndërkombëtarisht njihet si pjesë e Azerbajxhanit, ka qenë burim konflikti mes dy fqinjëve në rajonin e Kaukazit, që nga rënia e Bashkimit Sovjetik, në vitin 1991, dhe ndërmjet armenëve etnikë dhe azerëve për më shumë se një shekull.
Megjithë bisedimet sporadike për arritjen e një marrëveshje paqësore rreth përcaktimit të kufijve, zgjidhjen e dallimeve rreth statusit të enklavës dhe normalizimin e marrëdhënieve ndërmjet dyja vendeve, tensionet mes tyre mbesin të larta dhe incidentet e armatosura përgjatë kufirit të përbashkët janë të shpeshta./VOA