Dita e zgjedhjeve në komunën Dibër dhe Qendër Zhupë po kalon pa probleme, me pjesëmarrje më të madhe se në orët e paradites.
“Deri në orën 13 në komunën Dibër të drejtën e votës për zgjedhjet presidenciale e kanë shfrytëzuar 1710 persona ose 9 për qind e gjithsej 19.269 personave të regjistruar në listën e vetme zgjedhore. Në zgjedhjet parlamentare të drejtën e votës e kanë shfrytëzuar 2835 ose 15 për qind nga 19.311 persona. Sot, si në zgjedhjet e kaluara, në të gjitha 27 vendvotimet dita e zgjedhjeve kalon në rendin më të mirë”, deklaroi për MIA, Rilind Hasa, kryetar i KKZ-Dibër.
Edhe në komunën fqinjë, Qendër Zhupë, sipas kryetarit të KKZ-së, Nexhip Iljaz, dita zgjedhore po kalon në një atmosferë të drejtë dhe demokratike.
“Në komunën tonë deri në orën 13 të drejtën e votës, në zgjedhjet presidenciale e realizuan 688 qytetarë ose 9,34 për qind nga gjithsej 7.368, ndërsa në zgjedhjet parlamentare votuan 692 persona ose 9,38 për qind nga gjithsej 7.383 votues. Dalje më të madhe presim në orët e pasditës”, thotë Iljaz.
Dalja në rrethin e parë të zgjedhjeve presidenciale, më 24 prill, deri në orën 13, në Dibër ishte 13 ndërsa në Qendër Zhupë 9,12 për qind.