Sipas raportimeve mediatike, përfaqësuesit e Izraelit dhe të SHBA-ve kanë planifikuar të takohen të hënën e ardhshme në Uashington, për bisedime lidhur me ofensivën tokësore izraelite në Rafah të Rripit të Gazës. Delegacioni i shtetit hebraik pritet që të njihet nga afër me shqetësimet e Shteteve të Bashkuara të Amerikës dhe duhet të paraqesë alternativat.
Por, ky është vetëm një planifikim. Më herët, kryeministri izraelit, Benjamin Netanyahu e anuloi udhëtimin e tij, pasi Këshilli i Sigurimit i Kombeve të Bashkuara miratoi një rezolutë që bënte thirrje për një armëpushim të menjëhershëm. Ndryshe nga herët e kaluara, dokumenti nuk ndeshi në kundërshtimin amerikan që zakonisht vendos veto në raste të tilla.
Izraelitët kishin propozuar shtyrjen e bisedimeve deri të hënën, raportoi rrjeti televiziv amerikan, CNN.
Sërish, planifikimi është i ndërlikuar nga fakti se qeveria e Izraelit ka afat deri të dielën, pra nesër, për të hartuar një ligj të ri mbi çështjen e shërbimit të detyrueshëm ushtarak për burrat hebrenj ultra-ortodoksë. Prej kohësh, ata janë përjashtuar nga shërbimi i detyrueshëm ushtarak.
Për shkak të luftës në Rripin e Gazës, qeveria e Izraelit është nën presion për t’i dhënë fund përjashtimit të komunitetit ultra-ortodoks nga shërbimi ushtarak. Ligji që autorizonte përjashtimin e tyre humbi fuqinë vitin e kaluar.
Që prej atëherë, një rregullore e përkohshme ka qenë në fuqi, por vetëm deri të dielën. Qeveria e Izraelit, e cila gjithashtu përfshin parti me program fetar strikt, po punon mbi një ligj të ri, lidhur me një përjashtim të besimtarëve ultra-ortodoksë.
Netanyahu pati aplikuar në Gjykatën e Lartë për të zgjatur afatin sa i përket hartimit të projektligjit. Pas një urdhri të përkohshëm nga gjykata këtë javë, për të anuluar subvencionet shtetërore për burrat ultra-ortodoksë në moshë rekrutimi nga 1 prilli, një vendim pritet të merret nesër nëse po ashtu do t’i nënshtrohen shërbimit të detyrueshëm ushtarak në të ardhmen.
Kjo varet nga pjesa nëse gjykata miraton kërkesën e kryeministrit për një shtyrje të mëtejshme 30-ditore.
Për këtë arsye, ende është e paqartë nëse delegacioni izraelit do të lejohet të udhëtojë në SHBA ndërsa kjo çështje e brendshme politike është në zhvillim, raportoi CNN.
Sipas zyrtarëve amerikanë, një datë e saktë për vizitën në Uashington, nuk është caktuar ende.