Kosova zvogëlon sërish prezencën policore pranë objekteve komunale në veri të vendit. Kjo bëhet e ditur nga vetë Ministria e Brendshme që thekson se reduktimi do të jetë njësoj si herën e parë, po me 25 për qind.
Vendimi vjen pas vlerësimit nga Policia e Kosovës, EULEX-i dhe KFOR-i. Vlerësohet se situata në terren në katër komunat është e mirë. Gjithashtu thuhet se ekipet e Policisë së Kosovës, bashkë me EULEX-in dhe KFOR-in, do të vijojnë koordinimin për sa i përket gjendjes së sigurisë në komunat veriore.
Aktualisht, qeveria e Kosovës ka nisur me procedurat ligjore për largimin e kryetarëve shqiptarë nga katër komunat veriore. Ministri i Administrimit të Pushtetit Lokal, Elbert Krasniqi, njoftoi se nuk do ketë dorëheqje të kryetarëve, por referendum për largimin e tyre me firmat e të paktën 20 për qind të votuesve në komunat veriore.