Presidenti amerikan, Joe Biden i fitoi lehtësisht zgjedhjet paraprake në Miçigan, por një votë proteste e demokratëve të zemëruar për mbështetjen e tij ndaj luftës së Izraelit kundër Hamasit në Gaza, i tejkaloi pritshmëritë e organizatorëve. Hamasi, grup palestinez që udhëheq Gazën është shpallur organizatë terroriste prej Shteteve të Bashkuara dhe Bashkimit Europian.
Ndërkaq, ish-presidenti amerikan Donald Trump, i fitoi bindshëm zgjedhjet paraprake republikane në shtetin e Miçiganit, duke i rritur mundësitë për të fituar nominimin e partisë së tij, për zgjedhjet presidenciale të nëntorit.
Ndonëse pritej që Biden dhe Trump të fitonin lehtësisht në zgjedhjet paraprake në këtë shtet, procesi i numërimit të votave është vëzhguar nga afër, për të parë nivelin e mbështetjes që gëzojnë. Në Miçigan ku gjendet një komunitet i madh arabo-amerikan, votuesve demokratë u është bërë thirrje të plotësojnë fletëvotimet si “të pavendosur”, në shenjë proteste për politikën e Biden-it për Gazën.
Pas pothuajse gjysmës së votave të numëruara, numri i votuesve “të pavendosur”, ka shkuar në mbi 58 mijë, referuar organizatës Edison Research, duke tejkaluar shifrën 10 mijë që prisnin organizatorët e protestës.
Shumë prej pjesëtarëve të komunitetit arabo-amerikan, që e kanë përkrahur Biden-in më 2020-ën, tani janë të zemëruar. Përmes një deklarate, më vonë, Biden u shpreh se falënderon çdo banor të Miçiganit, të cilit i është dëgjuar zëri.
Shfrytëzimi i të drejtës së votës dhe pjesëmarrja në demokraci, është çfarë e bën Amerikën të mrekullueshme.
Sipas Edison Research-it, Biden gëzon 80% mbështetje në Miçigan, ndërsa 13% janë të pavendosur.
Pas 58% të votave të numëruara të republikanëve, Donald Trump gëzon 67% mbështetje në krahasim me rivalen e tij, Nikki Haley, me 27%. Duhet theksuar se shteti i Miçiganit, vazhdimisht e ofron mundësinë e identifikimit të votuesve si “të pavendosur”, për të kuptuar bazën e mbështetjes për një kandidat.
Miçigani pritet të luajë një rol vendimtar në zgjedhjet presidenciale të 5 nëntorit, kohë kur pritet të përballen kokë më kokë Biden dhe Trump, ashtu siç ndodhi në presidencialet e 2020-ës që u fituan nga demokrati Joe Biden.