Ministrit austriak të Financave, Magnus Brunner, i është marrë patentë shoferi për një muaj, për shkak se ka tejkaluar shpejtësinë me veturën e ministrisë, njoftoi sot ministria e Brunner.
Ai voziti BMW-në 50 kilometra në orë më shpejt se shpejtësia e lejuar, në një rrugë ku shpejtësia e kufizuar është 80 kilometra në orë.
Ai e shkeli ligjin pranë qytetit Dornbirn, i cili ndodhet në provincën e tij të lindjes, Vorarlberg. Policia e ka ndaluar pasi ka kryer veprën.
“Rrugës për në një takim privat, ministri nuk e vuri re kufirin e përkohshëm të shpejtësisë. Ai është penduar dhe kërkon falje”, tha Ministria austriake e Financave.
Megjithëse ministrat austriakë kanë shoferë zyrtarë, atyre u lejohet të drejtojnë një veturë zyrtare nëse e përdorin atë për qëllime private. Kjo nuk është hera e parë që Brunner ka probleme në trafik.
Siç raporton Reuters, një vit më parë ai përfundoi në spital me lëndime në kokë pas një aksidenti me një skuter elektrik në Vjenë.
Si shkak i këtij aksidenti ai ka theksuar se nuk ka qenë mjaft i kujdesshëm në momentin e vozitjes së skuterit.