Konstatimi i kreut të Bashkimit Demokratik për Integrim (BDI), Ali Ahmetit është se nëse miratohen ndryshimet kushtetuese, Maqedonia e Veriut dhe Shqipëria do të bëhen anëtarë të Bashkimit Evropian brenda katër viteve.
“Nëse ndryshojmë Kushtetutën, Shqipëria dhe Maqedonia e Veriut do të bëhen anëtarë të BE-së brenda 4 viteve. Me mbajtjen e konferencave të para ndërqeveritare të Shqipërisë dhe Maqedonisë së Veriut me Brukselin, fillojnë ndryshimet brenda këtyre vendeve në aspektin e infrastrukturës, mjedisit, sundimit të ligjit etj.”, tha Ahmeti.
Për sa i përket lidhjes me kryeministrin e Kosovës, Ahmeti në “Top Story” tha se kryeministri i Kosovës Albin Kurti po ndërhyn në punët e brendshme të shqiptarëve në Maqedoninë e Veriut. Ndërsa nga ana tjetër lavdëroi qëndrimin e kryeministrit të Shqipërisë Edi Rama, duke thënë se ai ka punuar për t’i bashkuar partitë shqiptare.
“Unë e kam thënë dhe e përsëris Edi Ramës si kryeministër i Shqipërisë ka diskutuar shumë hapur në Bruksel për anëtarësimin e Shqipërisë në BE, Edi ka qenë i zëshëm. Edi Rama nuk ka ndërhyrë në punët e brendshme të organizmit politik në Maqedoni, ka bërë përpjekje për t’i afruar partitë në Maqedoni, unë jam falënderues, mirënjohës për këtë qasje”.
“Ndërsa Albin Kurti ka pasur raste kur ka ndërhyrë, p.sh në zgjedhjet presidenciale zotri Kurti mbajti anë, doli në përkrahje të një pjese të partive politike në Maqedoni, edhe pse kishim marrëveshje në zgjedhjet presidenciale për president konsensual, që ishte Stevo Pendarovski atë kohë, pra para pesë viteve. Këtë e kemi bërë për të shprehur patriotizëm, as emocion, jemi dakorduar me Pendarovskin me partinë Lidhja Social Demokrate, i kemi dhënë përkrahje, mund të bëjë një lojë një teatër, por e dimë që në fund nuk ka fitues”, tha Ahmeti.
Ahmeti gjithashtu beson se mbështetja publike e Albin Kurtit për kandidatin presidencial të opozitës shqiptare (Aleanca për Shqiptarët dhe Alternativa) në vitin 2019 ishte ndërhyrje në skenën politike në Maqedoninë e Veriut.
“Ne nuk kemi shprehur patriotizëm, as emocional, as patriotik, kemi bërë marrëveshje me Stevo Pendarovskin, me Sindikatat Socialdemokrate, i kemi dhënë mbështetje, ai mund të bëjë një shfaqje në teatër, por e dimë që në fund nuk ka fitues”, ka thënë Ahmeti.
Ahmeti tha se pas lajmit për aksionin e “Vetëvendosjes” në Maqedoninë e Veriut, interesim ka shfaqur edhe bashkësia ndërkombëtare.
“Më kanë vënë në një situatë shumë të vështirë. Pse ankohet Kurti kur Vuçiq është politikisht aktiv në Kosovë, si e shpjegoni? Më lanë pa fjalë”, theksoi Ahmeti.
Ndërsa i pyetur se a do të kishte mendim tjetër nëse Kurti do të përkrahte partinë e tij, Ahmeti tha se “nuk ka kërkuar mbështetje nga Shqipëria dhe Kosova”.
“Nuk kam kërkuar mbështetje nga Shqipëria dhe Kosova, kam pasur kontakt me të gjitha partitë, por në radhë të parë me shtetin”, tha Ahmeti.