Presidenti Stevo Pendarovski sot ka qëndruar në Tetovë në kuadër të projektit “Ballë për Ballë me presidentin”, informojnë nga kabineti i shefit të shtetit. Gjatë vizitës në Tetovë, Pendarovski ishte i shoqëruar nga ministri i Shëndetësisë Fatmir Mexhiti, zëvendësministrja e Shëndetësisë Maja Manoleva dhe me u.d. drejtori i Fondit të Sigurimeve Shëndetësore, Asaf Abduramani.
Delegacioni i kryesuar nga presidenti Pendarovski fillimisht e vizitoi spitalin klinik – Tetovë dhe realizoi takim me drejtorin e përgjithshëm mjekësor, prof. dr. Ilir Demiri dhe me një pjesë nga stasi mjekësor dhe drejtues në institucionin.
“Presidenti Pendarovski u informua për aktivitetet e deritanishme për renovimin e ambulancave interniste, blerjen e pajisjeve të reja mjekësore dhe modernizimin e sallave të kirurgjisë në Qendrën Emergjente. Në takim u shpreh kënaqësia nga përkushtimi i fuqishëm i institucioneve kompetente për përmirësimin e kushteve spitalore dhe të shërbimit shëndetësor për qytetarët e Tetovës, nga rajoni, por edhe nga i gjithë vendi. Në këtë drejtim, bashkëbiseduesit kanë biseduar edhe për nevojën urgjente të punësimit të personelit të ri mjekësor, si në spitalin e Tetovës, ashtu edhe në spitalet e Shtipit dhe Manastirit”, thuhet në kumtesën nga Kabineti i presidentit.
Gjatë vizitës në spital, presidenti Pendarovski vizitoi repartin e ri të onkologjisë, i cili është vënë në përdorim që nga sot, repartin e rentgenit në të cilin janë instaluar dy aparate digjitale të sofistikuara dhe një mamomat, ambulancë e rinovuar, si dhe hapësirat e reja që zgjerojnë ndjeshëm kapacitetet për hospitalizim, terapi dhe trajtim të pacientëve.
Në Tetovë presidenti u takua me disa nga anëtarët e grupit joformal “Çkrap”, fotografë të cilët me entuziazëm të fortë mbijetojnë dy dekada.
“Përfaqësuesit e grupit fotografik, në të cilin kanë kaluar nëpër vite afro 80 fotografë, ndanë aktivitetet e tyre në drejtim të afirmimit të kësaj lloj shprehjeje artistike. Duke prezantuar një segment të vogël të krijimtarisë së tyre mbresëlënëse, fotografët e informuan presidentin Pendarovski se çdo vit realizojnë ekspozita me temë të lirë, në të cilat shpesh marrin pjesë vepra nga mërgimtarët tanë – anëtarë të “Çkrapit”, thuhet në kumtesën.
Presidenti Pendarovski ka vizituar edhe shtëpinë e familjes së njohur Palloshi nga Tetova.Në takim, presidenti theksoi kontributin e individëve të shquar nga kjo familje, të cilët lanë gjurmë të qëndrueshme në zhvillimin kulturo-historik dhe arkitektonik të Tetovës. Duke paraqitur konakun e tyre me vlerë muzeale, të ndërtuar dy shekuj e gjysmë më parë, mikpritësit iu referuan të kaluarës së afërt, kur ndërtesa ishte shtëpia e shumë brezave Palloshi.