Federata Ndërkombëtare e Gazetarëve (IFJ) informon se janë 94 gazetarë dhe punonjës të mediave, në mesin e të cilëve 9 gra që mbetën të vrarë gjatë vitit që po lemë pas, çka përbën dhe një rritje prej 67% krahasuar me të njëjtën periudhë të një viti më parë.
Një gjë e tillë po vë në pah nevojën për një standard të ri global për mbrojtjen e mediave.
Nëpërmjet një raporti të publikuar ditën e sotme, IFJ-ja ka theksuar edhe se thuajse 400 punonjës të mediave janë burgosur këtë vit ndaj bëhet e nevojshme një mbrojtje më e mirë e gazetarëve në mbarë globin. Në raport thuhet:
IFJ nënvizon se nevojitet një veprim shumë më i madh nga komuniteti ndërkombëtar për mbrojtjen e jetës së gazetarëve, si dhe për nxjerrjen e agresorëve të tyre para drejtësisë.
Sipas raportit, lufta në Rripin e Gazës, që filloi në tetor ka shkaktuar rritjen e ndjeshme të vdekjeve. 68 gazetarë, më shumë se një në ditë, janë vrarë që kur shpërthyen luftimet ndërmjet Izraelit e Hamasit, grupit palestinez të shpallur organizatë terroriste nga Shtetet e Bashkuara të Amerikës dhe Bashkimi Europian.
Të dhënat e IFJ-së kanë treguar se gjithsej 68 gazetarë kanë humbur jetën në krye të detyrës duke mbuluar luftën.
Lufta në Gaza është më vdekjeprurësja për gazetarët se çdo konflikti tjetër që kur IFJ-ja ka nisur të regjistrojë vrasjet e gazetarëve në detyrë, në vitin 1990. Vdekjet kanë ndodhur në një shkallë dhe ritëm të paprecedent.
Komuniteti ndërkombëtar, në veçanti Gjykata Ndërkombëtare Penale, duhet të marrë përgjegjësitë që i takojnë e të kryejë hetime gjithëpërfshirëse. Po ashtu, të ndjekë penalisht ata që kanë urdhëruar dhe kryer sulmet ndaj gazetarëve.
Në Europë, Ukraina mbetet një “vend i rrezikshëm për gazetarët” pasi gjatë vitit 2023, në luftën e Rusisë kundër Ukrainës, atje janë vrarë gazetarë ukrainas, rusë e francezë, sipas burimeve të IJF-së.