Opozita shqiptare ka kritikuar sot partinë në pushtet BDI-në për moslëshimin në përdorim të shkollës fillore në Vizbeg. Driton Sulejmani nga Alternativa tha se kjo shkollë nuk do të lëshohet në përdorim deri në fund të vitit 2023, ndonëse sipas tij ministri Jeton Shaqiri, pati premtuar se shkolla do të jetë gati për fillimin e mësimit në shtator të këtij viti.
“Banorët e Vizbegut, të lënë në margjinat e interesimit të qeveritarëve të BDI-së, megjithatë me të drejtë kanë hetuar e konstatuar se zvarritja e nisjes me punë të kësaj shkolle është e qëllimshme dhe se brenda natës do të jetë gati në prag të zgjedhjeve parlamentare. Ky taktizim brutal i BDI-së është edhe një tregues se çfarë është në gjendje të bëjë kjo parti për qëllime politike. Në rastin konkret, kjo parti, pa asnjë ndjenjë përgjegjësie, vazhdon të luajë me fatin e qindar fëmijëve dhe familjeve të Vizbegut në stilin “jo sot, por nesër…”- deklaroi Driton Sulejmani, Alternativa.