Disa prindër në Gaza janë udhëzuar që të shkruajnë emrat e fëmijëve të tyre në këmbë për të ndihmuar në identifikimin e tyre nëse ata ose fëmijët vriten, sipas videove të filmuara nga një gazetar që punon për CNN.
Videot janë nga Spitali i Martirëve Al Aksa në Deir Al Balah në qendër të Gazës, një zonë ku sulmet ajrore izraelite u zhvilluan gjatë natës së shtunës.
Ato tregojnë një foshnjë dhe tre fëmijë që janë vrarë, të cilët mbajnë emrat e tyre të shkruar në arabisht në krahët e tyre. Të katër shihen të shtrirë në barela të vendosura në dysheme në një dhomë që duket të jetë një morg, i cili është plot. Është e paqartë nëse prindërit e tyre janë vrarë gjithashtu.
Gazetari thotë se kjo praktikë është bërë më e zakonshme ditët e fundit. Ka pasur skena kaotike në disa spitale të Gazës pas sulmeve ajrore, me hapësirë të pamjaftueshme për të trajtuar fluksin e pacientëve dhe morgjet e tejmbushura .
Videot tregojnë se në pjesë të spitalit Al Aksa, i cili është i mbushur me pacientë, të lënduarit, përfshirë fëmijë, ishin shtrirë në korridore në shtretër dhe dyshekë të improvizuar të dielën në mëngjes.