Kryeministri dhe kreu i LSDM-së, Dimitar Kovaçevski ka theksuar dhe ka pyetur kreun e VMRO-DPMNE-së, Hristijan Mickoski të tregoj se sa herë ai dhe anëtarët e kryesisë së partisë së tij në periudhën e fundit kanë kërkuar dhe kanë pasur takime me liderin e BDI-së Ali Ahmeti dhe me përfaqësues të lartë të kësaj partie.
“Po ato parti që tash po e luajnë veten si luanë, kanë qenë si kotele në koalicion me të njëjtën parti politike BDI, për të cilën flasin sot, për 11 vjet. Lideri i VMRO-DPMNE-së dhe anëtarët e kësaj partie a kanë kërkuar dhe zhvilluar takime me liderin dhe zyrtarët e lartë të BDI-së dhe sa herë në gjashtë muajt e fundit? Çfarë kanë biseduar në ato takime, nëse i kanë pasur?”, pyeti kryeministri dhe lideri i LSDM-së, Dimitar Kovaçevski në tubimin e djeshëm tradicional në Selcë të Prilepit, me rastin e shënimit të festës shtetërore të 11 tetorit.
Por nga ana tjetër, lideri i VMRO-DPMNE-së, Hristijan Mickoski, i është përgjigjur pyetjes nga Shtipi, ku ishte për vizitë në terren në kuadër të fushatës partiake.
Ai ka thënë se nuk ka pasur asnjë takim me liderin e BDI-së Ali Ahmeti dhe se as nuk ka ndërmend ta kërkojë.
“Pasi ai po bën një pyetje, supozoj se e di përgjigjen. Asnjëherë, as kam kërkuar, as nuk kam ndërmend të kërkoj takim me personin e përmendur nga Kovaçevski. Unë kërkoj publikisht një takim liderësh, në të cilin për më shumë se tre dekada të gjithë kryetarët e partive parlamentare ulen dhe pajtohen për datat e zgjedhjeve”, theksoi Mickoski në përgjigjen e tij. (INA)