I vendosur në brigjet e Finlandës në Detin Baltik, një ishull i quajtur Supershi është ndoshta një nga ishujt më të veçantë në botë. Ky ishull është kaq i veçantë sepse nuk mund të arrihet nga një pjesë e madhe e popullsisë së botës, ose më mirë – nga asnjë mashkull. Disa vite më parë, një sipërmarrëse shiti kompaninë e saj dhe bleu këtë pjesë të “parajsës mbi tokë” për të krijuar oazin perfekt ekskluzivisht për gra. Të gjitha femrat mund të kalojnë disa ditë në këtë ishull dhe t’i përkushtohen vetes, trupit, mendjes, shpirtit…
Si u krijua ishulli për gratë
Komuniteti i njohur më mirë si Supershi, i cili mbledh gratë anembanë botës për të ndihmuar njëra-tjetrën për të jetuar jetë të shëndetshme dhe të fuqizuar, është ideja e Christina Roth, e cila deri pak vite më parë drejtonte një biznes konsulence me vlerë disa milionë euro. Ajo vendosi të shesë kompaninë e saj për të provuar diçka krejtësisht të re.
“Vendosa të fokusoj energjinë time në diçka argëtuese dhe diçka që më frymëzon, kështu që krijova një rrjet femrash të forta. Kështu më lindi ideja për ishullin. Doja t’u jepja grave një hapësirë për të qenë ato që janë dhe mësojnë nga njëra-tjetra, larg botës së jashtme”, ka thënë kjo grua e suksesshme për të cilën kanë shkruar mediat më me ndikim botëror gjatë lansimit të projektit. Që prej fillimit të projektit, ishulli ka “rrëmbyer” imagjinatën e grave në mbarë botën që kanë përqafuar bukurinë dhe vetminë e tij, duke e përdorur atë si ilaç për shpirtin dhe një katalizator për kreativitetin.
Në këtë tokë të gurtë, të rrethuar nga pylli me pisha, ka një hapësirë të mbrojtur të lirë nga presionet e jetës së përditshme në një shoqëri të dominuar nga meshkujt. “Ishulli ynë është një hapësirë rinovuese dhe e sigurt ku gratë mund të rizbulojnë veten dhe dëshirat e tyre, një vend ku mund të jenë ato që janë”, thotë Christina Roth. Ajri në këtë ishull është një nga më të pastërt në botë, i pasuruar me aromën e pishës, e cila është një balsam i vërtetë për shpirtin dhe trupin. Aktivitetet janë të përqendruara kryesisht në shëndetin dhe mirëqenien e grave, duke përfshirë klasat e jogës, meditimit dhe gatimit, si dhe aktivitete më të forta, si p.sh. lundrimi dhe noti. Për ata që preferojnë një pushim të qetë mes pemëve, ka mundësi për të kërkuar ushqim në pyll, ndërsa plazhi me rërë të artë ofron një vend për të bërë banja dielli.