Kryetari i Kuvendit Talat Xhaferi sot në Kuvend tha se nuk ka indikacione se situata në Kosovë gjatë fundjavës mund të ndikojë në Maqedoninë e Veriut.
“Nuk ka dyshim se Maqedonia e Veriut e ndjek nga afër situatën në Kosovë, duke pasur parasysh faktin se jemi anëtare me të drejtë të plotë në NATO dhe të përfshirë drejtpëdrejtë në misionin e KFOR-it në Kosovë dhe prej atje situata monitorohet nga afër. Lidhur me ndikimin e mundshëm në Republikën e Maqedonisë së Veriut, sigurisht që institucionet i marrin parasysh të gjitha informacionet të cilat mund të kenë ndikim. Por, për momentin nuk ka indikacione të tilla se mund të ketë pasoja për Republikën e Maqedonisë së Veriut”, tha Xhaferi dhe dërgoi ngushëllime për institucionet e Kosovës dhe familjet e personave që humbën jetën në incidentin e fundjavës në Kosovë.
Kryeparlamentari Xhaferi në brifing me gazetarët thekson se institucionet kompetente e monitorojnë nga afër situatën në Kosovë dhe sipas kësaj do të marrin masa.
“Institucionet e kryejnë punën e tyre me atë që janë të obliguara dhe kompetente. E ndjekin gjendjen e përgjithshme dhe sipas kësaj do të ndërmerren edhe masat adekuate”, tha Xhaferi.
Në pyetjen e gazetarëve se deri ku është procedura me Komisionin Anketues për ngjarjet në Klinikën e Onkologjisë, pasi Kuvendi dha dritë jeshile për formimin e saj, Xhaferi theksoi se kjo më nuk është kompetencë e tij dhe i udhëzoi gazetarët që të kontaktojnë kryetaren e Komisionit Kuvendor për Çështje të Zgjedhjeve dhe Emërimeve, Marija Georgievska lidhur me këtë çështje.