Një ngjarje e rëndë ka ndodhur sot në Ferizaj, ku një person i mitur është gjendur pa shenja jete në rrugën ‘Imri Neziri’.
Nga emergjenca kanë bërë me dije se kanë pranuar thirrje për ndihmë, për shkak se i mituri dyshohej se ishte në rrezik për jetën.
Ekipi mjekësor i Emergjencës ka dalë menjëherë në vendin e ngjarjes, ku kanë hasur në trupin e viktimës, i cili ishte i gjakosur. Pas ekzaminimeve për shenjat vitale, mjeku ka konstatuar se fëmija ka ndërruar jetë.
Lidhur me rastin është njoftuar edhe Policia e Kosovës, të cilët kanë dalë në vendin e ngjarjes për të kryer ekzaminimet e nevojshme.
Dyshimet e para janë që 14-vjeçari i ka dhënë fund jetës së tij, pasi në vendngjarje janë gjetur një armë zjarri dhe një gëzhojë, të cilat janë sekuestruar në cilësinë e provave materiale.
Me urdhër të prokurorit, rasti është cilësuar ‘Vetëvrasje’.