Kryeministri Dimitar Kovaçevski, së bashku me zëvendëskryeministrin për Çështje Evropiane, Bojan Mariçiq, janë për vizitë pune disa ditore në Shtetet e Bashkuara të Amerikës (SHBA). Në kuadër të vizitës, Kovaçevski, siç informojnë nga kabineti i tij, në Nju Jork do të ketë takime të rëndësishme me përfaqësues të lartë të Departamentit të Shtetit, të Forumit Ekonomik Botëror dhe Bankës Botërore, me përfaqësues të kompanive shumëkombëshe dhe komunitetit të biznesit maqedonas në SHBA, si dhe me përfaqësues nga Bashkimi Evropian.
Ndër takimet e planifikuara janë takimet me Drejtorin menaxhues të Forumit Ekonomik Botëror, Mirek Dushek, me Drejtoren menaxhuese të Bankës Botërore, Ana Bjerde, si dhe me Zëvendës ndihmës sekretarin shtetëror të SHBA-së dhe Përfaqësuesin special për Ballkanin Perëndimor, Gabriel Escobar dhe me Përfaqësuesin Special të BE-së për Ballkanin Perëndimor, Miroslav Lajçak.
Në fokus të bisedimeve është zhvillimi ekonomik i Republikës së Maqedonisë së Veriut, partneriteti Atlantik, perspektivat evropiane dhe rëndësia e partneritetit strategjik ndërmjet Maqedonisë së Veriut dhe SHBA-së në të gjitha këto procese të rëndësishme për cilësinë e jetës së qytetarëve të Maqedonisë.
Në kuadër të vizitës së punës në SHBA, kryeministri Kovaçevski do të marrë pjesë edhe në pritjen në përkujtim të 50 vjetorit të anëtarësimit të Gjermanisë në Kombet e Bashkuara.